நீங்க செல்லப்பிராணி வளர்ப்பவரா அவசியம் இதை கவனியுங்க...

நீங்க செல்லப்பிராணி வளர்ப்பவரா அவசியம் இதை கவனியுங்க…

ஆண்டுதோறும் உலகளவில் சுமார் 59 ஆயிரம் பேர் உயிரிழப்பு – செல்லப்பிராணிகளுக்கு தடுப்பூசி அவசியம்

Contents

நீங்க செல்லப்பிராணி வளர்ப்பவரா அவசியம் இதை கவனியுங்க…இந்தியாவில் ஆண்டுக்கு ஆயிரக்கணக்கான உயிரிழப்புகள்செல்லப்பிராணிகளிடம் பாதுகாப்புடன் பழக வேண்டும்கடித்தால் உடனடி சிகிச்சை அவசியம்

உலக ரேபிஸ் தினம் செப்டம்பர் 28-ஆம் தேதி கடைப்பிடிக்கப்படுவதையொட்டி, ரேபிஸ் நோய் தடுப்பு மற்றும் செல்லப்பிராணிகளைப் பொறுப்புடன் வளர்ப்பது குறித்து பொதுமக்களிடையே விழிப்புணர்வு ஏற்படுத்தப்பட்டு வருகிறது.

உலக சுகாதார அமைப்பு (WHO) மதிப்பீட்டின்படி, உலகளவில் ஆண்டுதோறும் சுமார் 59 ஆயிரம் பேர் ரேபிஸ் நோயால் உயிரிழக்கின்றனர்.என புள்ளிவிபரங்கள் கூறுகிறது. இதில் 95 சதவீதத்துக்கும் அதிகமான உயிரிழப்புகள் ஆசியா மற்றும் ஆப்பிரிக்காவில் ஏற்படுகின்றன. மனிதர்களுக்கு ஏற்படும் ரேபிஸ் பாதிப்புகளில் சுமார் 99 சதவீதம் நாய்களின் கடி அல்லது தொடர்பு மூலம் ஏற்படுகிறது.

இந்தியாவில் ஆண்டுக்கு ஆயிரக்கணக்கான உயிரிழப்புகள்

இந்தியாவில் ஆண்டுதோறும் சுமார் 91 லட்சம் விலங்கு கடி சம்பவங்கள் ஏற்படுவதாகவும், அவற்றில் பெரும்பாலானவை நாய்களால் ஏற்படுவதாகவும் மதிப்பீடுகள் தெரிவிக்கின்றன. ஆண்டுக்கு சுமார் 5,726 மனித ரேபிஸ் உயிரிழப்புகள் ஏற்படுவதாகவும் தெரிவிக்கப்பட்டுள்ளது.

செல்லப்பிராணிகளிடம் பாதுகாப்புடன் பழக வேண்டும்

செல்லப்பிராணிகள் சாப்பிடும்போதோ, தூங்கும்போதோ அல்லது குட்டிகளைப் பராமரிக்கும்போதோ அவற்றைத் தொந்தரவு செய்யக்கூடாது. அறிமுகமில்லாத விலங்குகளை திடீரென தொடுதல், கட்டிப்பிடித்தல் அல்லது சீண்டுதல் கூடாது. குழந்தைகள் செல்லப்பிராணிகளுடன் பழகும்போது பெரியவர்களின் கண்காணிப்பு அவசியம்.

விலங்கு பயப்படுவது அல்லது ஆக்ரோஷமாக இருப்பது தெரிந்தால் அதனிடம் இருந்து விலக வேண்டும். செல்லப்பிராணிகளுக்கு கால்நடை மருத்துவர் அறிவுறுத்தும் தடுப்பூசிகளை உரிய காலத்தில் செலுத்துவதுடன், வழக்கமான மருத்துவப் பரிசோதனைகளையும் மேற்கொள்ள வேண்டும்.

கடித்தால் உடனடி சிகிச்சை அவசியம்

நாய் அல்லது வேறு விலங்கு கடித்தாலோ, கீறினாலோ காயத்தை சோப்பு மற்றும் ஓடும் தண்ணீரால் குறைந்தது 15 நிமிடங்கள் கழுவ வேண்டும். பின்னர் தாமதமின்றி மருத்துவமனைக்குச் சென்று மருத்துவரின் ஆலோசனையின்படி ரேபிஸ் தடுப்பூசி உள்ளிட்ட தேவையான சிகிச்சையைப் பெற வேண்டும்.

ரேபிஸ் அறிகுறிகள் தோன்றிய பின்னர் நோய் மிகவும் ஆபத்தானதாகும். எனவே, விலங்கு கடியை அலட்சியப்படுத்தாமல் உடனடியாக மருத்துவ சிகிச்சை பெறுவது உயிரைக் காப்பதில் முக்கியமானதாகும்.

“செல்லப்பிராணியை நேசிப்போம்; தடுப்பூசி செலுத்துவோம்; விலங்கு கடியை அலட்சியம் செய்யாமல் உடனடி மருத்துவ சிகிச்சை பெறுவோம் – ரேபிஸைத் தடுப்போம்!”