தருமபுரியில் குரூப்-1 முதல்நிலைத் தேர்வு: 7,644 பேரில் 6,148 பேர் பங்கேற்பு; 1,496 பேர் வரவில்லை
தருமபுரி, செப்.27:
தமிழ்நாடு அரசுப்பணியாளர் தேர்வாணையம் (TNPSC) சார்பில் நடத்தப்பட்ட ஒருங்கிணைந்த குடிமைப்பணிகள் தேர்வு–1 (குரூப்-1) பணிகளுக்கான முதல்நிலைத் தேர்வு தருமபுரி மாவட்டத்தில் இன்று (27.09.2026) நடைபெற்றது. மாவட்டம் முழுவதும் 25 தேர்வு மையங்களில் காலை 9.30 மணி முதல் மதியம் 12.30 மணி வரை தேர்வு நடைபெற்றது.
தருமபுரி மாவட்டத்தில் இத்தேர்வை எழுதுவதற்காக மொத்தம் 7,644 தேர்வர்களுக்கு அனுமதி சீட்டுகள் வழங்கப்பட்டிருந்தன. அவர்களில் 6,148 பேர் தேர்வில் பங்கேற்ற நிலையில், 1,496 பேர் தேர்வு எழுத வரவில்லை.
இதையும் படிங்க
நல்லம்பள்ளி வட்டம் அதியமான் கோட்டை செந்தில் பப்ளிக் பள்ளி, தருமபுரி வட்டம் இலக்கியம்பட்டி அரசு ஆண்கள் மேல்நிலைப்பள்ளி, குண்டல்பட்டி டான் பாஸ்கோ மெட்ரிகுலேஷன் பள்ளி உள்ளிட்ட பல்வேறு தேர்வு மையங்களில் தேர்வு நடைபெற்றது.
தேர்வு நடைபெற்ற மையங்களை தருமபுரி மாவட்ட ஆட்சியர் வே. சரவணன், இ.ஆ.ப., நேரில் பார்வையிட்டு ஆய்வு மேற்கொண்டார். அப்போது தேர்வு மையங்களில் செய்யப்பட்டிருந்த அடிப்படை வசதிகள், பாதுகாப்பு மற்றும் முன்னெச்சரிக்கை நடவடிக்கைகள் குறித்து அதிகாரிகளிடம் கேட்டறிந்தார். மேலும், TNPSC விதிமுறைகளை முழுமையாகப் பின்பற்றி தேர்வை சிறப்பாக நடத்திட தேர்வுப் பணிகளில் ஈடுபட்டிருந்த அலுவலர்கள் மற்றும் கண்காணிப்பாளர்களுக்கு அறிவுரை வழங்கினார்.
தேர்வை சிறப்பாக நடத்தும் வகையில் மாவட்டத்தில் 25 கண்காணிப்பு அலுவலர்கள், 5 மொபைல் யூனிட்டுகள் மற்றும் காவல்துறையினர் பாதுகாப்பு மற்றும் கண்காணிப்புப் பணிகளில் ஈடுபடுத்தப்பட்டனர்.
மேலும், தேர்வு மையங்களுக்கு அருகில் பேருந்துகள் நின்று செல்லும் வகையில் ஏற்பாடுகள் செய்யப்பட்டதுடன், தேர்வர்களின் வசதிக்காக சிறப்புப் பேருந்துகளும் இயக்கப்பட்டன.
இந்த ஆய்வின்போது வட்டாட்சியர்கள் ராஜராஜன், ராஜசேகர், சுப்பிரமணி உள்ளிட்ட தொடர்புடைய அலுவலர்கள் உடனிருந்தனர்.
