தமிழகத்தின் 8 பகுதிகளில் புதிய குடியிருப்பு திட்டங்கள்
பொதுமக்கள் கேட்பை பதிவு செய்ய தமிழ்நாடு வீட்டுவசதி வாரியம் அழைப்பு
சென்னை, செப். 25:
தமிழ்நாடு முதலமைச்சரின் நல்வழிகாட்டுதலின்படி, வீட்டுவசதி மற்றும் நகர்ப்புற வளர்ச்சித் துறை அமைச்சர் ப. ராஜ்குமார் தலைமையில், பொதுமக்கள் பயன்பெறும் வகையில் தமிழ்நாடு வீட்டுவசதி வாரியத்தின் சுயநிதித் திட்டத்தின் கீழ், மாநிலத்தின் பல்வேறு முக்கிய பகுதிகளில் புதிய குடியிருப்பு திட்டங்கள் மேற்கொள்ளப்பட உள்ளன.
2026–2027 ஆம் ஆண்டிற்கான சட்டமன்ற மானியக் கோரிக்கை கூட்டத்தொடரின்போது இதற்கான அறிவிப்பு வெளியிடப்பட்டது.
அதனைத் தொடர்ந்து சென்னை மாவட்டத்தில் அண்ணா நகர், புரசைவாக்கம், நந்தனம், எர்ணாவூர், கடலூர் மாவட்டத்தில் குண்டுசாலை, மதுரை மாவட்டத்தில் எல்லீஸ் நகர், திருவள்ளூர் மாவட்டத்தில் திருமழிசை மற்றும் கன்னியாகுமரி மாவட்டத்தில் வல்லன்குமாரன்விளை ஆகிய 8 இடங்களில் பொதுமக்களின் தேவைக்கேற்ப புதிய குடியிருப்புகள் கட்ட திட்டமிடப்பட்டுள்ளது.
பொதுமக்களின் தேவையை அறிய பிரத்யேக இணையதளம்
இத்திட்டங்களைத் திட்டமிடுவதற்கு முன்பாக பொதுமக்களின் தேவையை (Demand Assessment) அறிந்து, அதற்கேற்ப குடியிருப்புகளை அமைக்கும் நோக்கில் தமிழ்நாடு வீட்டுவசதி வாரியம் தனது அதிகாரப்பூர்வ இணையதளத்தில் பிரத்யேக இணையவழி தளத்தை (Portal) உருவாக்கியுள்ளது.
இந்த இணையவழி தளத்தின் மூலம் பொதுமக்கள் தங்களுக்கு விருப்பமான பகுதி, குடியிருப்பு வகை மற்றும் தொடர்புடைய பிற தேவைகள் குறித்த விவரங்களைப் பதிவு செய்யலாம்.
இந்தப் பதிவு பொதுமக்களின் தேவையை மதிப்பீடு செய்வதற்காக மட்டுமே மேற்கொள்ளப்படுகிறது. இதன் மூலம் வீடு ஒதுக்கீடு செய்வதில் எவ்வித முன்னுரிமையும் வழங்கப்படாது என தெரிவிக்கப்பட்டுள்ளது.
எனினும், தேவைக் கணக்கீட்டிற்கான பதிவை வெற்றிகரமாக மேற்கொண்டவர்களுக்கு, திட்டம் செயல்படுத்தப்படும் போது விண்ணப்பங்கள் வரவேற்கப்படும் தேதி குறித்த விவரங்கள், அவர்கள் பதிவு செய்துள்ள செல்பேசி எண்ணுக்கு குறுஞ்செய்தி மூலம் தெரிவிக்கப்படும்.
எனவே, மேற்கண்ட பகுதிகளில் குடியிருப்புகளைப் பெற ஆர்வமுள்ள பொதுமக்கள் அனைவரும் தமிழ்நாடு வீட்டுவசதி வாரியத்தின் அதிகாரப்பூர்வ இணையதளமான tnhb.tn.gov.in-ஐ அணுகி, தங்களது குடியிருப்பு தேவையை விரைவாகப் பதிவு செய்து பயன்பெறுமாறு கேட்டுக்கொள்ளப்பட்டுள்ளது.

