சென்னையில் ரூ.1,200 கோடியில் புதிய சட்டமன்றம் மற்றும் தலைமைச் செயலக வளாகம்!முதலமைச்சர் ச. ஜோசப் விஜய் அறிவிப்பு

தமிழ்நாட்டின் எதிர்கால நிர்வாகத் தேவைகளைப் பூர்த்தி செய்யும் வகையில், சென்னையில் நவீன வசதிகளுடன் கூடிய சட்டமன்றம் மற்றும் தலைமைச் செயலகம் அடங்கிய புதிய கட்டட வளாகம் ரூ.1,200 கோடி மதிப்பீட்டில் அமைக்கப்படும் என்று முதலமைச்சர் ச. ஜோசப் விஜய் அறிவித்துள்ளார்.

Contents

சென்னையில் ரூ.1,200 கோடியில் புதிய சட்டமன்றம் மற்றும் தலைமைச் செயலக வளாகம்!முதலமைச்சர் ச. ஜோசப் விஜய் அறிவிப்பு 400 ஆண்டுகால நிர்வாக வரலாற்றின் அடையாளம்அதிகரிக்கும் நிர்வாகத் தேவைகள்ஒருங்கிணைந்த நவீன தலைமைச் செயலகம்புனித ஜார்ஜ் கோட்டை பாதுகாக்கப்படும்ரூ.1,200 கோடியில் 20 லட்சம் சதுர அடி

தமிழ்நாடு சட்டமன்றப் பேரவையில் இன்று (3.9.2026) விதி எண் 110-ன் கீழ் வெளியிட்ட அறிவிப்பில் முதலமைச்சர் இதனைத் தெரிவித்தார்.

400 ஆண்டுகால நிர்வாக வரலாற்றின் அடையாளம்

புனித ஜார்ஜ் கோட்டை 1640-ஆம் ஆண்டு கிழக்கிந்திய கம்பெனியால் சென்னையில் வணிகச் செயல்பாட்டு மையத்திற்காக வாங்கப்பட்ட நிலத்தில் கட்டத் தொடங்கப்பட்டு, 1644-ஆம் ஆண்டு கட்டி முடிக்கப்பட்டது. 1652-ஆம் ஆண்டு பிரசிடென்சி நிலைக்கு உயர்த்தப்பட்ட பின்னர், அது பிரிட்டிஷ் ஆட்சியின் அதிகாரப்பூர்வ தலைமையிடமாகத் திகழ்ந்தது.

இந்திய சுதந்திரத்திற்குப் பிறகு, புனித ஜார்ஜ் கோட்டை தமிழ்நாடு அரசின் தலைமைச் செயலகமாக தொடர்ந்து செயல்பட்டு வருகிறது. ஏறத்தாழ 400 ஆண்டுகளாக மாநிலத்தின் நிர்வாகப் பாரம்பரியத்தின் முக்கிய அடையாளமாக இவ்வளாகம் விளங்கி வருகிறது.

சுமார் 107 ஏக்கர் பரப்பளவு கொண்ட புனித ஜார்ஜ் கோட்டை வளாகத்தில், தமிழ்நாடு அரசின் கட்டுப்பாட்டில் தலைமைச் செயலகப் பயன்பாட்டிற்காக சுமார் 4 ஏக்கர் நிலப்பரப்பு மட்டுமே உள்ளதாக முதலமைச்சர் தெரிவித்தார். மீதமுள்ள நிலப்பரப்பு பாதுகாப்புத் துறை மற்றும் இந்தியத் தொல்லியல் துறை (ASI) கட்டுப்பாட்டில் இருப்பதால், வளாகத்தை விரிவுபடுத்தவும் மேம்படுத்தவும் கட்டுப்பாடுகள் உள்ளதாகவும் அவர் கூறினார்.

அதிகரிக்கும் நிர்வாகத் தேவைகள்

தற்போது தலைமைச் செயலகம் இரண்டு முக்கியக் கட்டடங்களில் செயல்பட்டு வருகிறது. புனித ஜார்ஜ் கோட்டையின் பிரதானக் கட்டடத்தில் சட்டமன்றம், முதலமைச்சர், அமைச்சர்கள், தலைமைச் செயலாளர் அறைகள், நிதித்துறை உள்ளிட்ட முக்கிய அரசுத் துறைகள் செயல்பட்டு வருகின்றன.

மேலும், நிர்வாகத் தேவைகளைப் பூர்த்தி செய்வதற்காக 1978-ஆம் ஆண்டு நாமக்கல் கவிஞர் மாளிகை தரைத்தளம் மற்றும் 10 தளங்களுடன், சுமார் 3.75 லட்சம் சதுர அடி பரப்பளவில் கட்டப்பட்டது. இங்கு 30-க்கும் மேற்பட்ட அரசுத் துறைகளின் செயலாளர்கள், அலுவலர்கள் மற்றும் 6,000-க்கும் மேற்பட்ட பணியாளர்கள் பணியாற்றி வருகின்றனர்.

கடந்த 40 ஆண்டுகளில் தலைமைச் செயலகத்தின் பல்வேறு துறைகளில் பணியாளர்களின் எண்ணிக்கையும் நிர்வாகப் பொறுப்புகளும் கணிசமாக அதிகரித்துள்ள நிலையில், தற்போதைய கட்டமைப்புகளில் போதிய மாற்றங்கள் மேற்கொள்ளப்படாததால் இடப்பற்றாக்குறை உள்ளிட்ட நிர்வாகச் சிக்கல்கள் நிலவி வருவதாக முதலமைச்சர் குறிப்பிட்டார்.

ஒருங்கிணைந்த நவீன தலைமைச் செயலகம்

தமிழ்நாட்டின் எதிர்கால நிர்வாக வளர்ச்சிக்கும், திறன்மிக்க நிர்வாகத்திற்கும் உலகத்தரத்திலான பொது நிர்வாக உள்கட்டமைப்பு அவசியம் எனக் குறிப்பிட்ட முதலமைச்சர், அனைத்து அரசுத் துறைகளையும் ஒரே நிர்வாக வளாகத்தில் ஒருங்கிணைக்கும் வகையில் புதிய தலைமைச் செயலகம் அமைக்கப்படும் என்றார்.

புதிய வளாகத்தில் தீயணைப்பு வசதிகள், மாற்றுத்திறனாளிகள் எளிதில் சென்றுவரும் வசதிகள், பசுமைக் கட்டடத் தரநிலைகளுக்கு ஏற்ப கட்டமைப்பு, போதுமான வாகன நிறுத்துமிடங்கள், மாநாட்டு அரங்குகள், பொதுமக்கள் சேவை மையங்கள் மற்றும் அலுவலர்களுக்கான நவீன வசதிகள் உள்ளிட்ட பல்வேறு வசதிகள் ஏற்படுத்தப்படும்.

புனித ஜார்ஜ் கோட்டை பாதுகாக்கப்படும்

புதிய தலைமைச் செயலக வளாகம் அமைக்கப்பட்டாலும், புனித ஜார்ஜ் கோட்டையின் பாரம்பரியக் கட்டடங்கள் வரலாற்று மரபுச் சின்னங்களாகப் பாதுகாக்கப்படும் என்றும் முதலமைச்சர் தெரிவித்தார். அவற்றின் வரலாற்று மற்றும் பாரம்பரிய மதிப்பை எதிர்காலத் தலைமுறையினரும் அறியும் வகையில் பாதுகாப்பு நடவடிக்கைகள் மேற்கொள்ளப்படும் என்றார்.

ரூ.1,200 கோடியில் 20 லட்சம் சதுர அடி

அடுத்த 100 ஆண்டுகளின் நிர்வாகத் தேவைகளைப் பூர்த்தி செய்யும் வகையில், 20 லட்சம் சதுர அடி பரப்பளவில், ரூ.1,200 கோடி மதிப்பீட்டில் நவீன வசதிகளுடன் கூடிய புதிய சட்டமன்றம் மற்றும் தலைமைச் செயலக வளாகம் சென்னையில் உருவாக்கப்படும் என்று முதலமைச்சர் ச. ஜோசப் விஜய் அறிவித்தார்.