மாணவர் தனுஷ் படுகொலை: சட்டம் – ஒழுங்கு சீர்கேட்டிற்கு சாட்சி! – தமிழ்நாடு அரசுக்கு எதிர்க்கட்சித் தலைவர் உதயநிதி ஸ்டாலின் கண்டனம்
சென்னை திருவொற்றியூரில் போதைப்பொருள் புழக்கத்தைத் தட்டிக்கேட்டதால், அரசுப் பள்ளியில் பிளஸ் 2 படித்து வந்த மாணவர் தனுஷ், 30 பேர் கொண்ட கும்பலால் தாக்கிக் கொலை செய்யப்பட்ட சம்பவம் அதிர்ச்சி அளிப்பதாக எதிர்க்கட்சித் தலைவர் உதயநிதி ஸ்டாலின் தெரிவித்துள்ளார்.
கோவையில் போதைப்பொருள் கும்பலைத் தட்டிக்கேட்டதற்காக கல்லூரி மாணவர் அமுதன் கொலை செய்யப்பட்ட அடுத்த சில தினங்களில், சென்னையிலும் இதுபோன்ற கொடூரச் சம்பவம் நடைபெற்றுள்ளதாக அவர் குறிப்பிட்டுள்ளார்.
சட்டம்-ஒழுங்கை நிலைநாட்டுவதில் இந்த அரசு எந்த அளவுக்கு தோல்வியடைந்துள்ளது என்பதற்கு, தமிழ்நாட்டில் தொடர்ந்து நடைபெறும் கொலைச் சம்பவங்களே சாட்சி என உதயநிதி ஸ்டாலின் தெரிவித்துள்ளார்.
போதைப்பொருள் பயன்படுத்துவதையோ, விற்பதையோ அம்பலப்படுத்தினால் அவர்கள் கொலை செய்யப்படுவார்கள் என்ற எச்சரிக்கை ஒட்டுமொத்த சமூகத்திற்கும் விடுக்கப்படுவதாக அவர் குற்றம்சாட்டியுள்ளார்.
“நிர்வாகத் திறனற்ற இந்த அரசைக் கண்டு சமூக விரோதிகளுக்குத் துளியும் பயமில்லை” என்றும் அவர் தெரிவித்துள்ளார்.
குறிப்பாக, பள்ளிகள் மற்றும் கல்லூரிகளில் இதுபோன்ற சம்பவங்கள் நடைபெறுவதை அரசு கண்டும் காணாமல் இருப்பது வெட்கக்கேடானது என்றும் அவர் கூறியுள்ளார்.
மாணவர் தனுஷ் கொலை வழக்கில் குற்றவாளிகளை விரைந்து கைது செய்ய வேண்டும் என்றும், இதுபோன்ற தொடர் சம்பவங்களுக்கு முற்றுப்புள்ளி வைக்கும் வகையில் அரசு உறுதியான நடவடிக்கை எடுக்க வேண்டும் என்றும் உதயநிதி ஸ்டாலின் வலியுறுத்தியுள்ளார்.
மேலும், பள்ளி, கல்லூரிகளில் போதைப்பொருள் பயன்பாடு உள்ளதா, அதற்கான காரணங்கள் என்ன, இதன் பின்னணியில் யார் உள்ளனர் என்பதையெல்லாம் உரிய முறையில் விசாரித்து அரசு நடவடிக்கை எடுக்க வேண்டும் எனக் கேட்டுக்கொண்டுள்ளார்.
வன்முறை எதற்கும் தீர்வல்ல என்பதை மாணவர்கள் உணரும் வகையில் அவர்களுக்கு ஆலோசனை வழங்கி, போதிய விழிப்புணர்வை ஏற்படுத்த வேண்டுமென தனது கருத்துகளை எதிர்க்கட்சித் தலைவர் உதயநிதி ஸ்டாலின் தனது எக்ஸ் பக்கத்தில் பதிவிட்டுள்ளார்.
