சமத்துவக் கோரிக்கைகளை வலியுறுத்தி தீண்டாமை ஒழிப்பு முன்னணி கையெழுத்து இயக்கம்
அரசியலமைப்புச் சட்டம் மற்றும் இயற்கை நீதியின் அடிப்படையில் சமத்துவத்திற்கான கோரிக்கைகளை வலியுறுத்தி, தமிழ்நாடு தீண்டாமை ஒழிப்பு முன்னணி சார்பில் தருமபுரி மாவட்டம் முழுவதும் கையெழுத்து இயக்கம் நடைபெற்றது.
அரசுத் துறைகளின் தனியார்மயத்தைத் தடுத்து நிறுத்துதல், தனியார் துறைகளில் இடஒதுக்கீட்டை அமல்படுத்துதல், ஒப்பந்தம் மற்றும் அவுட்சோர்சிங் உள்ளிட்ட பணிமுறைகளில் இடஒதுக்கீடு மறுக்கப்படுவதைத் தடுத்தல், மனிதக் கழிவுகளை மனிதர்களே அகற்றும் முறையை முற்றிலும் ஒழித்து இயந்திரமயமாக்குதல் உள்ளிட்ட கோரிக்கைகள் முன்வைக்கப்பட்டன.
மேலும், சாதி ஆணவப் படுகொலைகளைத் தடுக்க மத்திய சட்டம் இயற்றுதல், சாதி மறுப்புத் திருமணங்களுக்கு ஆதரவு வழங்குதல், உயர்கல்வி நிறுவனங்களில் சாதிப் பாகுபாட்டைத் தடுக்க சிறப்புச் சட்டம் கொண்டுவருதல், அரசுப் பள்ளிகள் மூடப்படுவதைத் தடுத்தல், எஸ்.சி., எஸ்.டி. மாணவர்களுக்கான கல்வி உதவித்தொகை மற்றும் விடுதி வசதிகளை மேம்படுத்துதல் உள்ளிட்ட கோரிக்கைகளும் வலியுறுத்தப்பட்டன.
பெண்களுக்கு நாடாளுமன்றம் மற்றும் சட்டமன்றங்களில் 33 சதவீத இடஒதுக்கீடு வழங்குதல், மதம் மாறிய கிறிஸ்தவ மற்றும் முஸ்லிம் தலித்துகளுக்கும் பட்டியல் சாதி அந்தஸ்து வழங்குதல், வன்கொடுமைத் தடுப்புச் சட்டத்தை வலுப்படுத்துதல், எஸ்.சி., எஸ்.டி. பெண்களுக்கான சிறப்புத் திட்டங்களை செயல்படுத்துதல், பட்டியல் சாதி மற்றும் பழங்குடியின தொழில்முனைவோருக்கு அரசு கொள்முதலில் உரிய வாய்ப்பு வழங்குதல் உள்ளிட்ட கோரிக்கைகளையும் பொதுமக்களிடம் எடுத்துரைத்து கையெழுத்துகள் பெறப்பட்டன.
அரூரில் மார்க்சிஸ்ட் கம்யூனிஸ்ட் கட்சியின் மாநிலக்குழு உறுப்பினர் பி. டில்லிபாபு இயக்கத்தைத் தொடங்கி வைத்தார். தீண்டாமை ஒழிப்பு முன்னணி மாவட்டத் தலைவர் எம். முத்து, ஒன்றியச் செயலாளர் பி. குமார், வட்டச் செயலாளர் பி.வி. மாது, பொருளாளர் சங்கு,ஜெயகாந்தன் ,கெம்பன்,கோபால் ,சிஐடியு நிர்வாகி சி. ரகுபதி உள்ளிட்டோர் பங்கேற்றனர்.
பென்னாகரத்தில் இந்திய கம்யூனிஸ்ட் கட்சியின் தேசிய செயற்குழு உறுப்பினர் எஸ். தேவராசன் இயக்கத்தைத் தொடங்கி வைத்தார். மாவட்டச் செயலாளர் ஏ. சேகர், வட்டச் செயலாளர் ஜே.பி. சுப்பரமணி உள்ளிட்டோர் பங்கேற்றனர். தருமபுரியில் மாவட்டப் பொருளாளர் வழக்கறிஞர் டி. மாதையன் தலைமையில் நடைபெற்ற கையெழுத்து இயக்கத்தில் நிர்வாகிகள் சி. காவேரி, எம். தமிழ்மணி உள்ளிட்டோர் கலந்து கொண்டனர்.
