அரசு விடுதிகளில் பணியாளர்களை வெளி முகமை மூலம் தேர்வு செய்வதை கைவிட்டு நிரந்த பணியில் தேர்வு செய்ய காப்பாளர் ஆசிரியர் சங்கம் வலியுறுத்தல். 

தமிழ்நாடு பிற்படுத்தப்பட்டோர், மிகவும் பிறப்படுத்தப்பட்டோர் மற்றும் சிறுபாண்மையினர் நலத்துறை காப்பாளர் ஆசிரியர் சங்கத்தின் மாநில சிறப்பு செயற்குழு கூட்டம், ஆக 31 அன்று விழுப்புரம் ஏ. எஸ் .ஜி கூட்டரங்கில் நடைபெற்றது.

கூட்டத்திற்கு நிறுவன தலைவர் எல். சகாதேவன், மாநில செயல்தலைவர் எம். முருகேசன், மாநில தலைவர் கே. நாராயண சாமி, மாநில முதன்மை செயலாளர் என். மணிமொழி ஆகியோர் தலைமை வகித்தனர்.

மாநில பொதுச்செயலாளர் இ. வேல்முருகன், மாநில பொருளாளர் ஆர். பாலமுருகன், மாநில பொருளாளர் ஏ. கலியமூர்த்தி, ஆகியோர் சிறப்புரையாற்றினார். மாநில இணை செயலாளர் செ.தினமணி, மாநில இணை ஒருங்கிணைப்பாளர் மு.அன்பழகன் ஆகியோர் தீர்மானம் குறித்து பேசினர்.விழுப்புரம் மாவட்ட பொருளாளர் யுவராஜ், கடலூர் மாவட்ட பொருளாளர் எஸ். மாரியப்பன், மாநில துணைத்தலைவர் எஸ். லாரன்ஸ், விழுப்புரம் மாவட்ட செயலாளர் ஏ. பிராங்ளின், ஆகியோர் முன்னிலை வகித்தனர். இக்கூட்டத்தில் மாநில நிர்வாகிகள், மாவட்ட நிர்வாகிகள், சமையலர் சங்க நிர்வாகிகள், விடுதி காவலர் சங்க நிர்வாகிகள் மற்றும் விடுதி தூய்மை பணியாளர்கள் சங்க நிர்வாகிகள் கலந்துகொண்டனர்.

கூட்டத்தில் கீழ்க்கண்ட தீர்மானங்கள் நிறைவேற்றப்பட்டன.

இத்துறை விடுதிகளுக்கு எந்தவொரு பணியிடத்திற்கும் குறிப்பாக சமையலர், காவலர்/ ஏவலர் மற்றும் விடுதி தூய்மை பணியாளர் ஆகியவர்களை வெளிமுகமை மூலம் தேர்வு செய்யப்படாமல், முறையான காலமுறை ஊதிய விகிதத்தில் நிரந்தர பணியிடங்களை உருவாக்கி அரசாணை பிறப்பிக்கப்பட வேண்டுமென்றும், இந்த ஆண்டு நிதி அறிக்கையில் அறிவிக்கப்பட்ட ஐந்து புதிய விடுதிகளுக்கும், வெளிமுகமையின் மூலம் விடுதி பணியாளர்களை தேர்வு அரசாணையை ரத்து செய்யவேண்டும்.

சென்னை, மதுரை, திருச்சி போன்ற பெரு நகரங்களில் உள்ள விடுதி மாணவர்களுக்கு ஒரு பொதுவான சமையல் கூடத்திலிருந்து உணவு தயாரிக்கப்பட்டு மாணவர்களுக்கு வேன் மூலம் சப்ளை செய்யப்பட வேண்டுமென்ற இந்த அரசாணையை ரத்து செய்துவிட்டு, தற்போதுள்ள நடைமுறையே தொடரவேண்டுமென இச்செயற்குழு கேட்டுக்கொள்கிறது. புதிய உணவு வழங்கும் நடைமுறையில் உணவு வழங்கப்படும் பட்சத்தில் பல்வேறு குளறுபடிகள் ஏற்பட்டு, மாணவர்களின் கல்வி நலன் பாதிக்கப்படக்கூடிய வாய்ப்பு உள்ளது. அரசாணை (நிலை) எண்: 26 நாள்: 25.01202 2 அன்று பிறப்பிக்கப்பட்ட அரசாணையின் படி முத்தமிழ் அறிஞர் டாக்டர் கலைஞர் அவர்களின் பிறந்த நாளான 03.06.2022 முதல் மாணவர்களுக்கு சத்தான சரிவிகித உணவு வழங்கப்பட்டு, வருகிறது. மேலும் ஒவ்வொரு நாளும் வெவ்வேறு வகையான உணவு வழங்கப்பட்டு வருகிறது. இந்த உணவு மாணவர்களின் விரும்பும் வகையில் உள்ளது. தற்போது பள்ளி விடுதி மாணவர் ஒருவருக்கு உணவு கட்டணம் ரூ.1400/-ம், கல்லூரி விடுதிகளுக்கு மாணவர் ஒருவருக்கு மாதம் ரூ.1500/- வழங்கப்பட்டு வருகிறது. வெளிமுகமை மூலம் உணவு தயார் செய்து வழங்கும் போது அரசுக்கு கூடுதல் நிதி சுமை ஏற்படுகிறது. இதனால் திராவிடல் மாடல் ஆட்சியின் கொள்கைக்கு மாறாக தனியார் மயமாக்குதலை கைவிட வேண்டுமென இச்செயற்குழு கேட்டுக் கொள்கிறது.

விடுதியில் புதிய மாணவர்களை தேர்வு செய்யும் போது, மாணவர்கள் 8-கி.மீட்டர் தூரத்திற்கு மேல் இருக்க வேண்டுமென்ற நடைமுறையை ரத்து செய்துவிட்டு, பெண்கள் விடுதிகளுக்கு உள்ள நடைமுறையை மாணவர்கள் விடுதிகளுக்கும் நடைமுறைபடுத்த வேண்டும். என்றும் தற்போது தமிழகத்தில்உள்ள பெரும்பாலான பள்ளிகளில் பயிலும் மாணவர்கள் 8-கி.மீட்டர் தூரத்திற்குள் உட்பட்டவர்களே பயின்று வருகின்றனர் என்பது குறிப்பிடத்தக்கது. இதனால், 8-கி.மீட்டர் தூரத்திற்கு குறைவாக உள்ள ஏழை, எளிய மாணவர்கள் தங்கி பயின்று பயன்பெறும் வகையில் அரசாணை பிறப்பிக்கப்படவேண்டுமென இச்செயற்குழு கேட்டுக்கொள்கிறது.